Aragón "provincia occidental dels països catalans"

Siempre heba teniu a Artur Quintana por un amigo d'Aragón, pero en un articlo publicau agora mesmo sobre a lei de luengas, lo prencipia afirmando que en a Edat Meya, lo catalán yera la luenga oficial en Aragón, no sólo, dizque, en Zaragoza, mesmo en lugars actualment aragonesófonos como Graus. Profes que no alporta denguna preba.
He leyiu bels documentos de o concello de zaragoza de o sieglo XVII y toz son en castellano, con ambute d’aragonesismos, as ordinacions de bellas cofrairias d’oficio de Zaragoza de o sieglo XIV y yeran de raso en aragonés. Ye sabiu que en a Corte de Pero IV d’Aragón s’escribiba en as dos luengas, aragonés y catalán, antimás de latín. O bilingüismo yera almitiu y muitas obras griegas se traduxeron tal’aragonés y o catalán de vez, como as vidas paralelas de plutarco, u de o italiano, como los viaches de Marco Polo.
Ixo de que lo catalán yera la luenga oficial en Aragón que afirma l’autor no se sostiene de denguna mena y á yo me pude a pancatalanismo. Si os pancatalanistas agora tienen la basemia de veyer a Aragón como una mena de “provincia occidental” de os países catalans, s’en son entivocando y mos trobarán a muitos en contra, anque sospeitamos que trobarán amigos, igual que os españolistas los troban.
Encara quedamos beluns que creyemos que Aragón ha de tener a suya endrecera, sin pender ni de Madrid ni de Barcelona.